ENTROIDO 2023

 Este Entroido 2023 empezou, coma sempre, cos mandadiños de Manolo, que unha vez máis nos acompañou nestas troulas e os de segundo participamos en todo. 

Despois chegou o desfile pola vila, pasando pola Galera, Lombardero, Fonte do Pilón, Praza Real, Praza de España, Saavedra Meneses, Peirao e o Pavillón, onde chegamos para facer a actuación. No percorrido, as familias gozaron vendo a nenos e nenas polas rúas cos seus disfraces tan bonitos.

A actuación foi todo un éxito!!! O tema de María Fumaça co seu Xiqui, Xoque, Fí, Fíu, encheu o pavillón de entusiasmo e ritmo e nenas e nenos de 1º e 2º demostraron o traballo de ensaios de moitos días que deron os seus froitos. 

Xa queda para o recordo de todos e para a historia do noso querido colexio, este día en que partiu un tren para percorrer vales e montañas e chegar a esa estación onde podemos soñar e cantar. 

Bo Entroido!!!

                                        

                  

               

PREPARANDO O ENTROIDO 2023: 2ºB DISFRACE DE MAPACHE

  Estimadas Familias:

Aquí  vos deixo uns vídeos que vos poden servir como guía para o maquillaxe de mapache, se ben podedes simplificalo segundo vos pareza. Igualmente os da cola por se queredes engadila e darlle máis realismo ao disfrace.

Tamén vos comparto a música do baile e a letra, para que nenos e nenas vaian practicando estes días.

Grazas pola vosa colaboración!

ENTROIDO 2022 1ºA-1ºB: "SOMOS PINCEIS E PALETAS"

Grazas familias pola vosa colaboración! O resultado foi fantástico e xa queda coma un bonito recordo do entroido de 1º de primaria. Todos e todas gozaron cos zancudos e os malabaristas e o desfile resultou moi ben, dentro de que nos permitiron as medidas establecidas polo situación actual. 

 Bo entroido!!!!

 

ENTROIDO 2022: DISFRACE DE PINCEL E PALETA DE PINTOR OU PINTORA 1ºA e 1ºB

Estimadas Familias: 

O vindeiro venres 25 de febreiro, celebraremos no colexio o Entroido e tendo en conta que este ano o Proxecto que traballamos durante o curso basease na obra do pintor Leandro Lamas, pensamos que sería unha boa idea facer un disfrace de pincel e paleta que non vos supuxera nin un gasto importante, nin tampouco un esforzo grande para a súa elaboración.

Aquí vos deixamos unha foto cos detalles, os materiais e datos sobre como facer a forma do pincel para a cabeza e a paleta. 

Respecto á vestimenta, pedimos que sexa toda negra para que non haxa diferenzas e se vexa uniforme. Se tendes algunha dificultade, por non dispoñer de roupa deste cor, podedes utilizar marrón escuro ou azul mariño, pero que leven pantalóns e parte de arriba iguais. 

 Grazas pola vosa colaboración.

 DISFRACE DE PINCEL E PALETA DE PINTOR OU PINTORA 

 VESTIMENTA: Toda de negro

 MATERIAIS: Cartolina prateada, ramas de vasoira, un pouco de porexpan, cola branca, pegamento de contacto, cartón e goma ancha de costura, pintura acrílica branca e cores. 

ADORNO DA CABEZA: A cartolina córtase tendo en conta o perímetro cranial do neno ou nena, (a altura debe ser duns 15 ou 20 centímetros) e grámpanse os extremos, despois cortamos o porexpan en forma circular para que o seu tamaño coincida co interior da circunferencia da primeira. As ramas crávanse e vanse axustando con cola e unha vez formado o pincel, a base pégase a uns 8 centímetros da parte superior da cartolina (máis ou menos). Deixamos uns modelos para obter as fibras do pincel.

PALETA: Para a paleta só necesitades un anaco de cartón e debuxar sobre el unha paleta de pintor. A medida será sobre 50 centímetros, máis pequena que a da foto. Pintade con pintura acrílica branca a superficie e unha vez que esta seque, pintades as cores como vedes na foto. Unha goma ancha de tres ou catro cm colocada no reverso, e ben suxeita con precinto, fará de asa para poder agarrar a paleta sen dificultades.

REMATA O ENTROIDO 2020 CO ENTERRO DO FINADO

Xa rematamos o entroido co enterro do finado. Houbo choros e despedida ata o outro ano, pero este 2020, deixounos un entroido en 1º que se gozou moito coa nosa carapuchiña igualitaria, cos Mandadiños de Manolo e con moitos traballos que fixemos na aula para celebrar este momento tan destacado das nosas tradicións. Xa andamos a darlle voltas de que nos imos disfrazar o vindeiro curso!!