BO PROVEITO! EXCURSIÓN A VILALBA 2019

Interesante excursión a que fixemos a Vilalba, para ver unha granxa de vacas que ten unha produción de leite das máis grandes de Galicia. Alí puidemos coñecer a estes animais elixidos por 1º e 2º, como parte do proxecto Bo Proveito!, en vivo, xa que moitos nenos e nenas, nunca puideran ver a muxidoira automática e gozar con estas vacas leiteiras da raza "frisona".
Unha vez que vimos o leite como produto natural, fomos á queixería Preste, onde se elabora o famoso queixo de San Simón e tamén outros con pemento e doutras especialidades. Esto deunos a oportunidade de ver un produto elaborado do leite: o queixo e descubrir como afuman o San Simón e como teñen queixos en cámaras especiais para maduralos con bacterias. Toda unha experiencia!!
A merenda fixémola na praia fluvial e puidemos gozar dunha bonita paisaxe e dun tempo marabilloso.
Polo camiño aproveitamos para repasar as árbores, os materiais de construción das casas e os traballos dos canteiros co granito nas igrexas así como as características dos lugares por onde pasabamos. Tamén cantamos e nos divertimos moito.
Unha boa oportunidade de levar as aulas ata os lugares reais dos que falan os libros.