COMEZAMOS O NOVO CURSO 2019-2020

Benvid@s ao novo curso 2019-2020, onde comezaremos unha nova etapa en 1º de E.P, con moito interese.

O proxecto no que traballaremos no PDI deste ano é a IGUALDADE e xa andamos a buscar diferentes camiños que nos permitan explorar este tema tan apaixoante.

Xa vos iremos contando!!!!

Por outra banda recordarvos que estamos a piques iniciar a actividade anual liderada polo Equipo de Dinamización da Lingua Galega do colexio, denominada "Lemos aos máis pequen@s", e que pon en valor a experiencia do alumnado de 5ª e 6º de primaria que len @s de 1º contos en galego, así que aproveitamos para comentarvos que pronto vos pediremos colaboración aos pais e nais e ás avoas e os avós, para veñades a ler tamén a 1º.

Estamos dándolle forma a esta iniciativa e vos manteremos informados e informadas. Veredes canto vamos gozar con esta colaboración e o gratificante que vos vai resultar.

É importante que dispoñamos o antes posible do material escolar, incluídas as fotos, para comezar a traballar. Agradecemos que se tedes algunha dúbida, faledes con nós para solucionala.

Aproveitamos este primeiro contacto co noso blog, para compartirvos o calendario escolar do curso, que permanecerá durante o ano escolar na columna da esquerda. Lembrade que faltan os días de libre elección por parte do colexio e dos que vos informaremos cando estén confirmados.

E para rematar animarvos a que vos fagades seguidores e seguidoras do noso blog e que o consultedes para coñecer as novidades das actividades que facemos.  Tamén podedes traballar os recursos educativos que podedes atopar mediante as etiquetas que aparecen na columna da esquerda co título PESCUDA AQUÍ.

Pronto comezaremos as reunións individuais, mediante as titorías, para manter unha colaboración permanente que favoreza o desenvolvemento de nenos e nenos.

Saúdos 

  

REVISTA DIXITAL ABRENTE EDLG Nº 39 2019

Rematamos o mes de xuño coa edición de Abrente nº39 do EDLG, na súa versión dixital, cun contido extenso. 
 "Almanaques de Peto" e as "Letras Galegas", son algúns dos grandes temas que tratamos neste número da revista que presenta un novo formato, destacando o traballo do alumnado e profesorado ao longo de todo o curso escolar 2018-2019. 
Abrente convírtese así nun lugar común de todas e todos, poñendo foco aos nenos e nenas de todos os niveis de infantil e primaria, para que teñan o seu espazo e brillen por igual, como é no caso do PDI sobre a Alimentación Saudable:"Bo Proveito!"  e en “Eu son Rosalía” que celebramos o "Día de Rosalía", onde a participación masiva de todo o colexio, profesorado e persoal non docente, é un modelo de integración do gran equipo que conforma o noso centro escolar.
 Proxectos innovadores como LÓVA , "O sistema Solar" e "Illa Fantasía", aparecen como parte deste novo número.
"Lemos aos máis pequenos e pequenas", "Madriñas e Padriños lectores", "Día da Paz", "Día da Poesía e do Teatro", o "Certame anual de Poesía Couceiro Freijomil", que este ano cumpre a súa XI edición, e o "Álbum Bilingüe" , axudan a favorecer que a nosa lingua se incorpore á vida cotiá do alumnado.
Finalmente comentar que Abrente forma parte do gran proxecto do EDLG O GALEGO NAS NOSAS MANS, no que participan, directa ou indirectamente, os 350 alumnos e alumnas  o profesorado, persoal non docente, familias e público en xeral, buscando como finalidade básica, conquistar unha “real” e “efectiva” competencia lingüística no idioma galego no noso centro.

O GALEGO NAS NOSAS MANS pretende ser un proxecto transformador que traslade o noso labor de dinamización dun xeito transversal, animando a todos e todas a levar a cabo os seus proxectos e actividades en galego. Tamén aspira a ser un proxecto inclusivo cunha clara aposta pola igualdade paritaria en tódalas actividades, fortalecendo a representación equivalente de nenos e nenas.

Preme na revista e amplia as páxinas na esquina superior dereita, para ver o seu contido. Tamén podes descargala ou imprimila.

 

FIN DE CURSO 2018-2019: PASAMOS A TERCEIRO!!

Adeus nosos nenos e nenas, foi marabilloso ser os vosos titores durante estes dous cursos escolares e o voso paso polas nosas vidas, queda xa como unha pegada imborrable de agarimo.

Despois de dous cursos de moito traballo e esforzo, por fin logrades o voso obxectivo e pasades a terceiro tod@s xunt@s, continuando con ese gran equipo que formáchedes cando chegáchedes a primeiro.

25N 2017

Fóchedes medrando físicamente, sempre fortalecendo a vosa amizade e así debedes seguir o voso camiño, sen perder ese sorriso e seguir aprendendo a ser boas persoas.

Saúdos da entrada 

O tempo pasa, pero non pasará nunca o cariño que sentimos por tod@s vós, os vosos profes Antón e Graci. Adiante Campións e campionas!!!

2017

2018

A FESTA DE DESPEDIDA

  

 

Ata sempre!!

EXPOSICIÓN DO PROXECTO "BO PROVEITO!"

Este curso o Proxecto Documental Integrado (PDI) do noso colexio, denominouse: Bo Proveito! e estivo vinculado á alimentación saudable.
Neste vídeo facemos un resumo das diferentes actividades que abordamos, especialmente respecto ao animal que eliximos 1º e 2º para traballar : A VACA
Na exposición do proxecto colaboramos profesorado e alumnado e o resultado podedes valoralo vós.

XOGOS POPULARES 2019

Hoxe gozamos na praia de Cabanas dunha mañá de xogos populares excelente, onde houbo compañerismo e traballo en equipo.

Aproveitamos para facer estas fotos de fin de curso e tamén de fin dun ciclo que remata con 2º e abre xa un novo camiño na vida de todos e todas hacia 3º

Non perdades nunca ese sorriso !!!

  

BO PROVEITO! VISITA Á "CASA DO QUEIXO" DE GRIXALBA

Para rematar o traballo que viñemos a facer durante todo o curso sobre as vacas, dentro do PDI BO PROVEITO!, fomos ver a Casa do Queixo en Grixalba. 

Choveu espeso todo o día, pero nós estivemos quentiños traballando moito para facer queixo, pan e chourizos.

Nada máis chegar déronnos unhas medallas e repartíronnos en grupos, así puidemos compartir con compañeiras e compañeiros  de 1º e de 2º

Despois de atender a como nos iamos a organizar, xa puidemos comer a parva, pois tiñamos moita fame.E logo xa empezamos a traballar nos obradoiros

 Tamén visitamos a granxa e vimos tódolos animais, especialmente as vacas e o cabalo.

A vaquiña non nos quitaba ollo porque xa sabía que era a máis importante de todos os animais, xa que nesta volta, puidemos ver o muxido manual e non o automático, como cando fomos a Vilalba. Pero fixemos unha simulación pois era perigoso facelo na mesma vaca. Xa vedes que Lúa e Roi estaban moi atentos a non verter o leite.

           

           

 Aquí facendo pan

                   

   

                                               Ata os profes gozaron vendo a granxa

 Que ricos os chourizos! Eses fixémolos nós

   

   

Novamente comendo!!!

   

E para rematar, un festival de cancións. Incluindo a Sensén, que nos cantou en chinés. Bravo rapaciños e rapaciñas !! Foi un día cheo de sorpresas.